الشمس كوره دهب

الشمس كوره دهب
فيها وردة دهب
وفيها ناس مش ناس وفيها حلم بعيد ..
فيها حب فيها أمل معاها يوم سعيد
الشمس بنت حلوة بتختفى في حضن السما
تتكسف اوى وتتدارى ورا سحاب مرسوم
بايد طفل صغير على سطح فوق
أو يمكن بنوته حلوة بضفيرة ورا شباك
وستارته حلم ونور
القلب حلم صغير وسط ضلوع
مش مهم .. آدم ولا حوا
ما الحب كائن وحيد
بيستوطن وقت الدفا .. وقت الحاجة بينزل دموع
ولما يتعب اوى ينام على حلم شجرة مايلة
وسط مطره جيه
المطرة لؤلؤ من السما ..
بنحبها سوا ..
أنت وأنا ..
فيها دموع بتضحك ..
من ملاك كان زعلان ..
ولما شافنى دمع كمان ..
ورمى مطره ليا عشان ابتسم من جديد
الابتسامة ماشية هناك على أمل مع شمس
تعبت من المغيب
على صوت لحن مرسوم في قارب
ماشى وسط موج أو يمكن على ضفة نيل
بيستنى مينا بيستنى شيء بعيد
كل الكلام بنقوله .. نحسه اوى بين ضلوعه
ولما نحسه أوى بيقف كل الكلام
ونلاقى الصمت والسكات في العيون
لغز ماشى وسط شارع
وسط حارة وسط ألف حلم قرب يميل
وتيجى ابتسامه حلوة من حد منعرفوش
نرفع العيون للسما من بلكونه
ياما شافت مننا حب وهوا
نقول يارب من قلب طاهر نضيف
ولما تتعب القلوب
تقوم نصلى في الحسين
ويمكن نصلى يدوب ركعتين
وسط أوده ضلمة فيها صريخ
والعقل فيها في جنون
ولما نحب تانى مرة .. ننسى اللي فات
مع انه مبيتنسيش
يالى رايح ويالى جاى
ارقص أوى .. ارقص كمان
خلى ابتسامتك زى شجرة .. ألف فرع
وجزر في البطون
خلى روحك بس صافيه .. وانسي الغروب
هقفل كتابي .. وأسيب الكمنجا
أصل اللحن كان جميل
ألحق أنام على صوته ..
ألحق أنام على صوته ..
وتنتهي الحكاية ومتتنهيش
ويتبقى قلم بيكتب
ياترى هعيش .. امسكه تانى بين إيديا ومعاه أعيش .. معاه أعيش